الست لبيبه

الإثنين فبراير 28, 2011 10:39 am

جارتنا الواعية الست لبيبة

ست عجوزة سوسة وكئيبة

تسمعها تقول لا بشوف ولا بسمع
ولا بمشى لادام ولا برجع
وطول النهارعمالة تتوجع
صوتها عالى حاجة رهيبة
طول النهار تعالى يا صباح
روحى يا صباح
وصباح لا بتهمد ولا ترتاح
دى مرات ابنها عبد الفتاح
لو خش فى ايده كيلو تفاح
تبقى ليلة سودا ومالها صباح
الست لبيبة حشرية
عارفة اخبار البشرية
تسأل تتطقس وتعسعس
لازم تعرف كل خفية
جنب الشباك وقصاد الباب
قاعدة للرايحة وللجاية
ع السلم مين طالع وجاى منين
والنازل رايح على فين
والحارة لو فيها مناسبة
تلاقيها تحسب ميت حسبة
فلانة جت وفلان لسة
حفظاهم كدة من غير لستة
وولاد ابنها عاملين دوشة
ترقع منهم يجى مليون صوت
العبوا برة ياولاد الكلب
راح يقع البيت من كتر الدب
وكفاية مناهدة انا عندى القلب
خدى يا صباح هاتى الدبوس
ع السجادة جنب الترابيزة
يا خرابى مش بتقولى عنية
يا سوادك هتقرى علية
انا شمة ريحة ملوخية
من عند جارتنا فتحية
خدى يا بت انتى وهى
عايزة ايه يا ستى
روحى لجارتنا فتحية
هاتى منها طبق ملوخية
ليه كدة يا حماتى
راح اجيب واعملك
لا مش عايزة حاجة منك
روحى انتى يا ليلى لفتحية
وانتى يا نادية روحى لحورية
هاتى قرنين فلفل متخلل
لجل ما ابلع الملوخية
ومن الشباك باصة تملى
على دكان عبد المتجلى
انا واخدة بالى من الدكان
لو كنت عايز تصلى
وازى سماح بنتك وابنها متولى
لسة بتتخانق مع جوزها
قطيعة جواز القرايب
امال لو مكنش ابن عمة خالة امها
صحيح ما تيجى المصايب غير م القرايب
ربنا يسطرها يا خالة لبيبة
بقولك ايه هبعت لك نادية
ابعتلى معاها باكو لبان
علشان اجرب طقم السنان
بت يا صباح تعالى اقولك
شفتى هويدا بنت عمك
مالها يا حماتى
ملوية يا هبلة من امك
اصل امك حما قرارية
وتلاقيها كدة حشرية
امى هى بتقوم من ع المصلية
طب قومى اجرى يا مخفية
اعملى شاى بمية معدنية
قال امها ع المصلية
بتصلى الفرض وتنقب الارض
هو فيه يا خايبة زى حماتك
انا لا حشرية ولا مؤذية
يا عينى علية
قاعدة فى حالى
كافية خيرى شرى
لا لية دعوة بام زيد
ولا ام صبرى
خد ام اقولك يا حسين
مين اللى معدى من تحت البيت ده
مش ده عمك ابو ياسين
ايوة يا ستى
ويا ترى ليه راجع بدرى
ميكونش رفدوه
والا يكون تعبان
يام ياسين ابو ياسين
راجع بدرى ليه خير يا اختى
ولا حاجة يا خالة
ده واخد اجازة
وواخدها ليه خير يا ختى
علشان هيسافر لامه وابوه
بعتولوا انهم بعافية شوية
لا الف سلامة يا ست ثنية
يا واد يا حسين
اقفل يابنى الشباك
لجل ما اقيل ساعتين
الشاى يا حماتى
حماتى يا حماتى
يوه لحقت نامت
صحيح اخبار البلد مع مين
مع العمى والمكسحين
اياك تتكسحى ادين ورجلين
يا صباح يا مرات ابنى عبد الفتاح
ايوه هو انتى صاحية يا حماتى
ايوة يا بنت القرداتى
هاتى الشاى ولحد ما يجى عبد الفتاح
سبينى انام ساعة وارتاح
وحسابك بعدين يا صباح

السبت أبريل 23, 2011 2:38 am

شكرررررررررررررررررا لك

الست لبيبه

الست لبيبه

رد: الست لبيبه